ബെംഗളൂരു: കനത്ത ഗതാഗതക്കുരുക്ക്, കുതിച്ചുയരുന്ന വീട്ടുവാടക, രൂക്ഷമായ കുടിവെള്ള ക്ഷാമം—ഒരു സാധാരണക്കാരന്റെ ജീവിതം ദുസ്സഹമാക്കാൻ പോന്ന നിരവധി പ്രശ്നങ്ങൾ ബെംഗളൂരു നഗരത്തിലുണ്ട്. നഗരജീവിതത്തെക്കുറിച്ച് ഇവിടെയുള്ളവർ നിരന്തരം പരാതിപ്പെടാറുമുണ്ട്. എന്നാൽ, എത്രയൊക്കെ വെല്ലുവിളികളുണ്ടായാലും ഇവിടെയെത്തുന്ന ഒരാൾ പോലും ബെംഗളൂരു വിട്ടുപോകാൻ തയ്യാറാകാത്തത് എന്തുകൊണ്ടാണ്? സോഷ്യൽ മീഡിയയിൽ വൈറലായ ഒരു ബെംഗളൂരു ടെക്കിയുടെ വീഡിയോ ഈ ചോദ്യത്തിന് കൃത്യമായ മറുപടി നൽകുന്നു.
പഠനം പൂർത്തിയാക്കിയ ശേഷം കരിയറിലെ മികച്ച അവസരങ്ങൾ, സാമ്പത്തിക സ്വാതന്ത്ര്യം, വ്യക്തിപരമായ വളർച്ച എന്നിവ ലക്ഷ്യമിട്ടാണ് രാജ്യത്തിന്റെ വിവിധ ഭാഗങ്ങളിൽ നിന്നുള്ള യുവാക്കളും യുവതികളും ബെംഗളൂരുവിലേക്ക് വണ്ടികയറുന്നത്. നഗരത്തിന്റെ അടിസ്ഥാന സൗകര്യങ്ങളെക്കുറിച്ച് വലിയ രീതിയിലുള്ള വിമർശനങ്ങൾ ഉയരുമ്പോഴും ഇങ്ങോട്ട് ഒഴുകുന്ന ജനങ്ങളുടെ എണ്ണത്തിൽ യാതൊരു കുറവുമില്ലെന്ന് ഈ വീഡിയോ വ്യക്തമാക്കുന്നു.
ബെംഗളൂരുവിൽ താമസിക്കുന്നവർക്ക് ഈ നഗരത്തോട് തോന്നുന്ന വികാരം വളരെ വിചിത്രമാണെന്ന് ടെക്കി വീഡിയോയിലൂടെ ചൂണ്ടിക്കാണിക്കുന്നു. സത്യത്തിൽ, ആളുകൾ ഈ നഗരത്തെ വെറുതെ സ്നേഹിക്കുകയല്ല ചെയ്യുന്നത്. മറിച്ച്, തങ്ങളെ മികച്ച രീതിയിൽ മാറ്റിയെടുക്കാൻ ബെംഗളൂരു നൽകിയ പിന്തുണയെയാണ് അവർ പ്രണയിക്കുന്നത്. ചിലർക്ക് ഈ നഗരം സ്വപ്നം കാണാൻ പോലുമാകാത്ത വലിയ ശമ്പളമുള്ള ജോലികൾ നൽകി. മറ്റു ചിലർക്ക് സ്വന്തമായി ഒരു സ്റ്റാർട്ടപ്പ് സാമ്രാജ്യം കെട്ടിപ്പടുക്കാനുള്ള മണ്ണായി ഇത് മാറി. ആദ്യമായി ഇവിടെയെത്തി തങ്ങളുടെ കുടുംബത്തിന്റെ സാമ്പത്തിക അടിത്തറ തന്നെ മാറ്റിമറിച്ച ഒട്ടനവധിപ്പേർ നമുക്ക് ചുറ്റുമുണ്ട്. കരിയറിനെ കൃത്യമായി രൂപപ്പെടുത്തിയെടുത്ത മികച്ച മാർഗദർശികളെ കണ്ടെത്തിയത് ഈ നഗരത്തിൽ വെച്ചാണെന്ന് കരുതുന്നവരും കുറവല്ല.
തങ്ങളുടെ ജീവിതം മാറ്റിമറിച്ച ഇത്തരം വലിയ നേട്ടങ്ങൾ ഉള്ളതുകൊണ്ടാണ് ട്രാഫിക്കും വാടകക്കയറ്റവും പോലുള്ള നിരന്തരമായ പോരാട്ടങ്ങൾ സഹിച്ചും ജനങ്ങൾ ഇവിടെത്തന്നെ തുടരുന്നത്. അതുകൊണ്ടുതന്നെ ബെംഗളൂരു എന്നത് വെറുമൊരു നഗരമല്ല, മറിച്ച് പലരുടെയും ജീവിതത്തിലെ വലിയൊരു വഴിത്തിരിവാണെന്ന് വീഡിയോ വ്യക്തമാക്കുന്നു.
സോഷ്യൽ മീഡിയയിൽ വലിയ രീതിയിലുള്ള ചർച്ചകൾക്കാണ് ഈ വീഡിയോ വഴിതുറന്നിരിക്കുന്നത്. നഗരത്തെ എത്രയൊക്കെ വിമർശിച്ചാലും ആരും ബെംഗളൂരു വിട്ടുപോകാൻ തയ്യാറല്ലെന്നാണ് വീഡിയോയ്ക്ക് താഴെ ഒരു ഉപയോക്താവ് കുറിച്ചത്. ട്രാഫിക്കും ഉയർന്ന വാടകയും യഥാർത്ഥ പ്രശ്നങ്ങൾ തന്നെയാണ്, എന്നാൽ കരിയറിലെ വളർച്ചയ്ക്ക് ഈ നഗരത്തെക്കാൾ മികച്ച മറ്റൊരു ഓപ്ഷനില്ലെന്ന് മറ്റൊരാൾ സാക്ഷ്യപ്പെടുത്തുന്നു. ബെംഗളൂരു മനുഷ്യന്റെ ക്ഷമയെ കഠിനമായി പരീക്ഷിക്കുമെങ്കിലും അതിനെയെല്ലാം മറികടക്കാൻ പോന്ന മികച്ച അവസരങ്ങൾ നഗരം തിരികെ നൽകുമെന്നാണ് ഭൂരിഭാഗം പേരുടെയും അഭിപ്രായം.
